toki jan ale o! ni li SITELEN PI SULI MUTE A! sitelen ante pi suli mute li lon la mi wile pali e sitelen mi pi suli mute. ni la ona li lon! kama la ni li kama SULI MUTE! tenpo mute la mi alasa pali e ni a. tenpo nanpa wan la mi awen ala e sitelen. tenpo nanpa tu la ilo sitelen pi ilo Nijosite li pakala. mi wile ala e pakala ilo la tenpo ni la mi sitelen e ni kepeken ilo Nopa li pana e ona tawa ilo sitelen pi ilo Nijosite li sitelen ala kepeken ilo sitelen pi ilo Nijosite. ike la sitelen suli tu pi tenpo pini li weka. sitelen tu ni li kama suli. ona li suli lili. taso ona li suli. wile mi la sitelen ni li weka ala. ante la mi o toki pi PAN SIKE! pan sike li pona tawa mi. sitelen tawa Sintananko la ona li toki mute e nimi ‘pan sike’. ona li nasa a. sitelen tawa Sintatanko la sitelen tawa pi toki Ipe Asinle li lon. sina sona ala e toki Ipe Asinle la o sona e ni. toki ni la o weka e kalama pini tan open nimi li pana e ona tawa pini nimi li pana e kalama ‘a’ tawa pini. kalama open li open e nimi la o pana e kalama ‘ja’ tawa pini. nimi ‘pan sike’ li kama ‘anpa ikesa’. tenpo mute la mi toki Ipe Asinle. mi lukin pi nanpa wan e sitelen tawa ni la mi awen ala e ni. tenpo la mi toki Ipe Asinle lon poka pi jan sama mi. ona li musi a. mi toki ni lon poka pi jan ante li nasa e ona. tenpo ala la mi pali e ni. taso mi pali e ni la o’li ken musi. tenpo pini lili la mi pali e nimi ‘o’li’. ona li lili e nimi ‘ona’ e nimi ‘li’. nimi ni li musi a. wile mi la jan mute li kepeken e nimi ni tan ni. nimi ‘ona li’ li musi ala. musi ala li pona tawa jan ala. tenpo ni la sitelen ni li lili a. taso tenpo kama la ona li kama suli a! ken la mi awen sitelen e ni lon tenpo kama mute. taso tenpo ni la ona li suli ala. taso mi awen sitelen e ni li suli mute e ona! sina kute ala kute e kalama musi To To tan kulupu Asan Kanpi? ona li kalama pona a. o alasa e ona kepeken ilo Jutu! tenpo mute la mi pana e kalama ni lon poka pi jan sama mi. ona li nasa a e ona. ni li pona tawa mi. kin la toki pali mi li nasa e jan sama. toki pali mi li ike a tawa ona!